Персональный сайт

Қазақстанда ақылды қала пайда болады

psy — Thu, 24 Nov 2011 06:56:55 GMT

Әлемнің біраз елдерінде ақылды қалалар бар. Енді міне қазақстанда да ақылды қала пайда болмақ. «Ақылды қала» жобасы телекоммуникация саласы дамымай, жүзеге аспақ емес. Сондай-ақ ақылды қаланың тұрғындары ақылды әрі білімді, ақпараттық технологиядан хабардар болуы шарт. Астана бұл талаптарға жауап бере алатынын Байланыс және ақпарат министрі Асқар Жұмағалиев келтірген деректерден түсінуге болады. Министрдің айтуынша, бүгінде Қазақстан халқының 50 пайызға жуығы интернетпен қамтамасыз етілген. Ұялы желі абонеттерінің саны болса, 137 пайыздан асыпты. Яғни қазіргі таңда Қазақстан тұрғындары кем дегенде 1 телефоннан, кейбіреулері 2-3 телефоннан ұстайды. «Интернет пайдаланушылар 41 пайыздық межеден асты. Ал Астанада интернет пайдаланушылардың саны 47 пайыздан көп. Қазіргі таңда еліміздегі сандық жүйеге көшу шегі 90 пайыздан асса, Астана 100 пайызға жеткен», - дейді А.Жұмағалиев. Министр келер жылдың алғашқы тоқсанында елордамыз-да эфирлік-сандық телеарналар пайда болатынын жеткізді. Ал 2013 жылдың басында 4G технологиясы өндірістік іске қосылып, бірте-бірте өзге қалаларда дамитын болады. Астана интернет
және ұялы байланыс тарифтері төмендігімен де қолайлы қалаға айналуда деуге негіз бар. Мәселен, биыл ұялы байланыс операторларының желі ішінде қоңырау шалу тарифтері 33 пайызға, роуминг тарифі - 48, интернет коннект 20 пайызға қысқарды. Көтерме интернет тарифі де шамамен 65 пайызға, абоненттік төлем 8 пайызға төмендеді. «Осындай төмендеу 2012 жылғы 1 қаңтарда жүзеге асырылады», - дейді министр.
Бүгінде «электронды үкімет» пен «электронды әкімдік» порталдары да дамуда. 8,7 млн анықтаманың «е-үкімет» порталы арқылы берілуі соның дәлелі. Электрондық санды қолтаңбасы бар кез келген адам «е-үкіметтен» 74 интерактивті қызмет пен 2000 ақпараттық қызметті алуына болады. Асқар Жұмағалиев мемлекеттік органдармен әлеуметтік маңызы бар 40 қызметті автоматтандырылып жатқанын жеткізді. Соның бірі - кәсіпкерлер алдағы жылдан бастап «е-үкімет» порталы арқылы ЖШС-ны тіркеу туралы куәлікті 15 минуттың ішінде алу мүмкіндігіне ие болмақ. «Қазір ол құжатты алуға шамамен 30 күн қажет. Біздің жағдайда интернет арқылы 15 минуттың ішінде алуды ұсынамыз және келесі жылдан бастап жүзеге асыра бастаймыз. Менің ойымша, бұл біздің кәсіпкерлердің көңілінен шығатын болады деп сенемін», - деді А.Жұмағалиев.

Рамазан айы 1 тамызда басталады

psy — Fri, 17 Jun 2011 06:33:33 GMT

Рамазан айы – күндіз ораза ұстау 1-ші тамызда басталып 31-ші тамызда аяқталады.

Нұрсұлтан Назарбаев өзіне дауыс бергендердің бәріне ризашылығын білдірді

psy — Mon, 04 Apr 2011 03:08:42 GMT

Нұрсұлтан Назарбаев өзіне дауыс бергендердің бәріне ризашылығын білдірді
4-ші сәуірдің түн жарымында «Нұр Отан» ХДП президенттікке кандидат Назарбаев Орталық сайлау комиссиясының мәліметтерімен танысып өз штабында болды.
Нұрсұлтан Назарбаев өзіне дауыс бергендердің бәріне ризашылығын білдірді деп хабарлайды Tengrinews.kz. Президенттік сайлау аяқталғаннан кейін 4-ші сәуірдің түн жарымында «Нұр Отан» ХДП президенттікке кандидат Назарбаев өз штабында болып қайтты. Назарбаев Орталық сайлау комиссиясының мәліметтерімен танысты, соңғы мәлімет бойынша Назарбае Н.Ә. 94,8 пайыз дауыс жинаған.
Нұрсұлтан Назарбаев шын жүректен өзіне дауыс берген азаматтардың бәріне ризашылығын білдірді. Ол 2011-жылғы сайлаудың тәуелсіздігіміздің 20-жылдығы қарсаңында өтіп отырғандығын және сондықтанда оның тарихи екендігін атап өтті. Назарбаев өзінің штабының және республиканың қалалары мен өңірлеріндегі оның мүшелерінің жұмысына риза екендігін айтты. Ол бұдан әрі де қазақстан халқының жарқын болашағы үшін жұмыс істеймін деді.
Орталық сайлау комиссиясының Астана уақытымен 22.30 дағы мәліметі бойынша барлық сайлаушылардың 90 пайызы дауыстарын берген. Бұл тәуелсіздік жылдарындағы рекордтық көрсеткіш.

ЖАҢА ЖЫЛ ҚҰТТЫ БОЛСЫН!

psy — Fri, 31 Dec 2010 04:50:48 GMT

Ағайынға - амандық, елге - есендік бергей! Алла тағала Жаңа жылда бәрімізге жақсылығы мен берекесін, ынтымағы мен ырысын, шаттығы мен қуанышын ала келсін! Жаңа жыл бізді биікке бастасын. Қиындықтан халқымыз қорқып, саспасын. Еңселі ел ретінде биік белестерді еңсерейік. Қандай заман болса да елдің бірлігі мен ынтымағынан жазбасын. Ұрпағымыз азбасын. Ұлт алдына ұлы міндет қойылды: Ел болу. Елдікті сақтау. Ел ретінде даму. Осындай әлемдік бәсекеде қазақ деген халықтың аты бәйгенің алдынан келсін!
Бір болайық. Бірге болайық. Елдің жүгін бірге көтеріп, халықтың арбасын тартуға бірге жегілейік.
Әр қазақтың баласы ел үшін, жұрт үшін орынды қарекет қылудың қамында болсын. Қазаққа қазақ қарайлассын! Бір-бірімізге қол ұшын берелік. Сөз жәрдемі мен өз жәрдемімізді аямалық.
Тәуелсіздіктің 20 жылдығында туған тіліміз төрге шықсын. Қазақ тілін бойында қазақтың бір тамшы қаны бар қазақ баласы үйде де, түзде де қолданатын болсын!
Үйі жоқтар - үйге, күйі жоқтар - күйге жетсін! Қоян жылы қоянша көбейіп, кездескен кедергілерден ор қояндай орғып-орғып өте шығайық!

Ассалаумалейкум Саммит!

psy — Wed, 01 Dec 2010 04:01:41 GMT

Ассалаумағалейкум, OSCE!

Әрбір отбасына береке, бақыт қонғай!

psy — Thu, 11 Nov 2010 09:08:43 GMT

Құрметті мұсылман бауырлар, отандастар!
Алланы бір, Мұхаммед (с.ғ.с.) пайғамбарды хақ деп білетін мұсылман баласы үшін Жаратушымыз белгілеп берген екі мейрамның ұлығы Құрбан айт күндеріне де жеттік. Алла Тағаланың разылығы үшін мал шалынып, кең дастарқан жайылып, еңбектеген сәбиден еңкейген кәріге дейін шат-шадыман қуанышқа бөленетін бұл ұлық мейрам Қазақстан жұртшылығына да ырыс пен береке әкелсін! Бұл күндердің ұлықтығы сол – мұнда адам баласы өз Жаратушысына барынша жақындай түсуге тамаша мүмкіндік алады. Асылы, «Құрбан» сөзі де араб тілінен аударғанда «жақын болу», «жақындау» мағынасын білдіреді. Олай болса, құрбандық шалуды тек мал сойып, қан шығару емес, Алланың рахым-мейіріміне қол жеткізудің бір жолы деп түсінген абзал.
Құрбан шалу – сонау Ибраһим (ғ.с.) пайғамбардан жалғасып келе жатқан үрдіс. Бұл ғибадат арқылы Алланың ықыласты құлдары өз сеніміне беріктігі мен берілген нығметтерге шүкіршілігін танытады. Қасиетті Құран Кәрімде: «Аллаға қүрбанның еттері, қандары, әсте, жетпейді. Бірақ сендердің тақуалықтарың жетеді» («Хаж» сүресі, 37-аят), – делінген. Аятта құлшылық ретінде сойылған құрбандықтың маңызды бір шарты шынайылық пен тақуалық екендігі ашық баяндалған. Олай болса, мәселе Алла жолына аталған малдың еті мен қанында емес, оны шалушының тақуалығында. Сондықтан да құрбан шалынып жатқанда «Аллаһумма минкә уә ләке» (Уа, Алла тағалам, бұл мал Сенен келді, Саған барады) деген дұғаның көбірек айтылуы тегін емес.
Құрбан айт күндері шариғат бойынша нисап мөлшеріндегі, яғни 85 г. алтынға тең ақшасы бар, басы азат, ақыл-есі бүтін, жолсапарда емес, мұсылманға кем-кетіксіз бір жастағы қойды не ешкіні яки бір адамнан жеті адамға дейін ниет ете отырып екі жастағы сиыр немесе бес жастағы түйені құрбандыққа шалу уәжіп. Құрбандықтың уәжіптігі қасиетті Құранда: «Раббың үшін (айт намазын) оқы, құрбандық шал» («Кәусар» сүресі, 2-аят), – деп бұйырылған. Ал әз-Пайғамбарымыз (с.ғ.с.): «Кімде-кім мүмкіндігі бола тұра құрбандық шалмаса, біздің намаз оқитын жерімізге жақындамасын!» – деп ескерткен. Бұл хадис құрбан шалу мерзімін бейқамдықпен өткізіп алмауға үндейді һәм сараңдық танытып, бұйрықты орындаудан бас тартудың күнә екенін білдіреді. Ардақты Алла елшісінің (с.ғ.с.) осы сүннетіне аса байыппен қарап, шын ризашылықпен дұрыс шалынған мал Алла Тағала разылығына қол жеткіздіруі мүмкін.
2010 – Отанымыз үшін ерекше жыл. Тәуелсіз мемлекеттер достастығына мүше елдер арасында Қазақстан тұңғыш рет 56 мемлекет құрамына енетін халықаралық аса беделді – Еуропа Қауіпсіздігі мен ынтымақтастығы ұйымына төрағалық етуде. Әлемдік үлкенді-кішілі мемлекеттердің басшылары мен ірі қайраткерлердің, сарабдал сарапшылардың бұған қатысты берген бағасы мен пікірі мейлінше жоғары. Құрбан айттан кейін Астанада осы ұйымға кіретін мемлекет басшылары мен халықаралық беделді ұйымдар өкілдерінің келелі бас қосуы – саммиті өтпек. Онда әлемдік күрделі мәселелер қаралып, талқыланады. Осының бәрі жас тәуелсіз Қазақстанның, оның дана басшысы Нұрсұлтан Әбішұлы Назарбаевтың зор абыройы мен беделінің арқасы екенін әлем танып, мойындап отыр. Мұны әрбір отандасымыз зор мақтаныш етіп, үлкен жетістік деп біледі. Бұл үшін Алла Тағалаға сансыз мақтауларымыз бен шүкірлігіміз болсын.
Құрметті мұсылман бауырлар мен отандастар! Ұлық мереке құтты болсын! Айт күнгі ізгі ниеттеріңіз бен шалған құрбандықтарыңызды Алла Тағала қабыл етсін. Әрбір отбасына бақыт, береке қонғай! Көп ұлт пен ұлысты Отанымызға бірлік пен ынтымақ бергей!
Жаратушы Иеміз сүйікті Қазақстанымыз бен ел қамында жүрген Елбасымыздың мерейін үстем етіп, халқымыздың ауызбірлігін арттыра бергей! Әмин! Шейх Әбсаттар қажы Дербісәлі,
Қазақстан Мұсылмандары діни басқармасы және Орта Азия мүфтилер кеңесінің төрағасы, Бас мүфти

Индиго балалар. Олар кімдер?

psy — Thu, 11 Nov 2010 09:05:27 GMT

Антикалық мифологиядағы олимптік құдайлар өз балаларының өзінен асып туғанын қаламайды. Олар мәңгілік өмір сүргендіктен де мәңгілік билікті ешкіммен бөліскісі келмейтін болуы керек. Мәселен, Зевс Крон әкесінің тағына отырды. Ал адамдар ше? Адамдар өз ұлының өзінен артық тууын Тәңірден жалбарынып сұрайды. Мықты әкелер мықты ұлдарды өмірге алып келеді. Біздің қазақы дүниетаным баланың атадан асып тууын қалайды. «Бір ұл бар - атаға жете туады, бір ұл бар - атадан кете туады, бір ұл бар - атадан өте туады» дейді ол сана. Осы үш ұлдың «атадан өте туғанын» елтұтқа деп білді немесе «Атадан ұл туса игі, ата жолын қуса игі» дейді. Мұнда да сол - ұлттың болашағы. «Күндердің күні болғанда, жаманнан жақсы туады, адам айтса нанғысыз, жақсыдан жаман туады, бір аяқ асқа алғысыз» дегенінде сүйектің тазалығы, тектің, қанның тазалығын ескере отырып, кейде анау атақты сөздегідей «ұлылардың ұрпағында табиғат демалады» дегенге де меңзейтін тұстары жоқ емес. Бірақ сонда да «атасы жақсы», «ата көрген», «текті жердің баласы» деп «тартпай қоймас негізгеге» сілтеме жасайды. Ия, «жақсы ұл атасының басын төрге сүйрейді, жаман ұл атасының басын көрге сүйрейді» деуі - өмір тәжірибесінен көргені, тұшынғаны, түйсінгені. Содан келіп «Кісі болар баланың кісіменен ісі бар, кісі болмас баланың кісі ісінде несі бар?» деп баланы қоғамға бейімдейді. Кісімен сөйлесе білу - үлкен өнер. «Аузынан сөзі түскен, иығынан бөзі түскен» ынжық қай қоғамның мүшесі болып жарытсын. Мұның бәрі ұлттың бала тәрбиесіне қаншалықты жауапкершілікпен қарағанын көрсетсе керек.
Әпсана сөйлейді: «Дәуіт пайғамбардың отыз ұлы болған екен. Пайғамбарымыз сәждеге бас қоя беріп, маңайында улап-шулап жүрген отыз ұлына қарап масаттанып, күпірлік қылған екен. Жайнамаздан басын көтергенде отыз ұлының да қырылып қалғанын көреді. Сонда пайғамбарымыз Жаратушы Иеге сыйынып, шүкіршілікке келеді. «Отыз ұлыңды берейін бе? Әлде отыз ұлға татитын бір ұл берейін бе?» дегенде отызға татыр бір ұл беруін сұрапты». Дана халқымыздың да сұрары сол - бәріне татыр бір ұл. «Тоғыз ұлым - бір төбе, Ертөстігім - бір төбе» дегені де осы ғой. Он ұл - он оқ - қол. «Өтемістен туған он едік, онымыз атқа мінгенде жер қайысқан қол едік» дейді азия жолбарысы. Мамай батырдың он ұлы да - бір ел. Сонымен, артып туған бала дегеніміз кім? Бір аңыз бар еді, есі кіріп, етегін жапқан баласын нағашыларына амандасып қайтсын деп анасы еліне жібереді. Жолға шыққан жалғыз ұл нағашысының ауылының төбесіне жеткенде ауыл адамдары «аттан» салып батырдың ордасына кіріп, жау шапқанын айтады. Қараса, шынында да теріскейден түмен қол көкжиекті жапқан бұлттай түнеріп келеді екен. Сонда батыр: «Жиенім ержеткен екен ғой» дейді. Жалғыз салт атты бала - қалың қол болып көрінген. Бұл «аруақты ер» дегенге сайса керек-ті. Жалғыз батырдың жауды қашырар сұсы, еңсесін басар мысы да осы - құдайдан берілген қасиеті. Қазақтың «бала бер, бала берсең сана бер, сана бермесең ала бер» дегені баладан жерігендігі емес, биік ұлттық мұраттың атынан сөйлегендігі. Және де «атаның баласы болма, адамның баласы бол» дейді. Осыншама ұлы мақсаттың жолында келіп бір уақта «бозбаласы бошалаң, қырсыға туды қыз балаң», «шошимын кейінгі жас балалардан» дегені «ақырзаман жастары» деген пессимистік ұғымның көрініс бере бастауы ма? Ұлттың түңілуі ме? Ұрпақтың шаршауы ма? Қанның сұйылғаны ма? Жоқ, ол талаптың күшейгендігі, мұраттың биіктегендігі. «Бала қойдың артынан еріп жүре алса болды» дегеннің қалғандығы. Ендігі бала - басқа бала. Ауылда жүргенде «елдің баласы бала сияқты, менің балам бәле сияқты» деп, шырылдатып баласын сабап жатқанды аз көрмедік. Сонда айтатыны: «Баламды жаман болсын деп ұрмаймын». Болмаса Тургеновтің кейіпкері секілді: «Қыз менікі! Не қылсам да өзім білемін» дейді ғой. Сонда естігеніміз - «Қазақы бала бала емес, орыс бала - молодец». О, талай «молодец» болғымыз келді-ау. Енді бұл бөлек әңгіменің желісі. Бүгінгі айтпағымыз - «болашақтың адамдары», «алтыншы нәсіл» деп ат қойылып, айдар тағылып үлгерілген «индиго» феномені. Яғни - «Индиго балалар».
Бернард Шоу өзінің «Мафусаилге қайта оралу» деген атақты пьесасында «Олар маған келіп өз баласының ерекше туғандығын айтады. «Ондай бала әлі жер бетінде болмаған» дейді. Ал мен олардың миллионын көрдім ғой» деген секілді ойды Хауа анамыздың аузына салады. Ия, кім баласының кем болғанын қаласын? «Жұмсағым» деп сүйген кірпі, «аппағым» деп сүйген қарғаның мейірімі секілді әр адам өз баласын өзгеше деп біледі. Оның дарынды екеніне сенеді. Өз ортасынан оқ бойы озып тұр деп, тіпті заманынан артып туды деп санайды. Ол - заңды. «Сүйер ұлың болса сүй» демей ме?!
Сонымен, «Индиго балалар» деп кімдерді атаймыз? Ли Кэрролл, Джен Тоубер «Индиго балалар» атты шығармасында «Олар қасиетті мүддемен келді: махаббат пен келісімге, шыншылдыққа негізделген жаңа қоғамның туғанын айтпаққа. Адамзат дамуының жаңа баспалдағын баспаққа. Өткенге тамырымен байланған бүгінгі әлемге олар болашақтан келді. Олар сананың балиғатында, сезімінің кәмелетінде. Жалғандық пен жасандылықты жек көреді. Енді ойлап көріңіз, жасандылыққа негізделген бұл қоғамда өмір сүру оларға қаншалықты ауыр екенін. ... Өз балаларыңыздың дамуын шектемеңіздер, оларға көмектесіңіздер - олар біздің және мына әлемнің болашағы» дейді. Бұл - ғасырлардан бері келе жатқан таным. «Болам деген баланың бетінен қақпа, белін бу» дейді халқымыз. Ал Крайон деген автор болса «Кейінгі кезеңдерінде» «Қаракөк аурасы бар Жаңа Дәуірдің туғандығы туралы ақпаратым сіздің есіңізде болар. Сіз оларды «индиго» балалар деп атадыңыз, өйткені олар әлі балалар еді» дей келіп, біздің технократты әлемімізден - экологиялық катаклизмдерден қорғану үшін жаңа қорғаныш қабаты - жаңа иммундық сауыттың қалыптаса бастағанын айтады. Ол ойдың, сезімнің жаңа дәуірге өтуіне мүмкіндік береді. Адамзат баласына келген ақырғы пайғамбар айтты деген сөз бар ғой: «Енді менен кейін әулиелер мен ақындар келеді». Бұл «индиго» балалар туралы таным да соған ұқсайды. Енді жаңа «болашақтың адамдары», «алтыншы нәсіл» жер бетіне келуде. Осы ұғымды алып келген экстрасенс Нэнси Тэпп адамдардың аурасының түсіне қарап болжамдар жасаған. Атау Үндістанда өсетін шөптің түсінің бала аурасының түсімен сәйкес келуінен алынған. Оның пайымдауынша, енді жиырма жылдан кейін жер бетіндегі барлық бояу түстері (қызыл түстен басқасы) жойыла бастайды екен. «Индиго - гуманистер» «сары» түсті алмастырады, «Индиго - концептулистер» «алтын түстесті» және «жасыл» түсті алмастырады, «индиго - суретшілер» «көк» және «көкшілқызыл» түсті байқайды, ал индиго - барлық өлшемде өмір сүре алатындар» сол «көкшілқызыл» түсті жояды екен. Міне, интернет ақпараттары осылай сөйлейді. 1975 жылы Уран Сарышаян белгісіне кірген кезде алғашқы «индиголар» өмірге келе бастапты. Ал олардың жаппай туылуы 1985 жылдың тамыз айының аяғынан бастап, яғни Прозерпина жұлдызы Сарышаян белгісіне кірген кезде басталған көрінеді. «Индиго» балалардың ерекше белгілері деп мінез-құлық және физиологиялық ерекшеліктерге байланысты төмендегі қасиеттерін атайды:
1) Олар көбіне солақай келеді; 2) мінез-құлықтың құбылмалылығы; 3) шығармашылықпен ерте айналысуы; 4) шизо белгілері, жармақ, қызбалылық, 5) жаңа замандық технологияларға жоғары бейімділік; 6) бойындағы қуаттың молдығы; 7) аса сезімталдылық және интуитивті түйсіктің дамығандығы; 8) Индивидуализм. Авторитеттер мен стеоротиптерді мойындамау; 9) Мистикаға бейімділік; 10) Оқшаулану. Ұжымдық сананың жоқтығы; 11) Жауапкершілікті жоғары сезінушілік. Әділетсіздікті жек көру; 12) Кез келген істен тез жалығып кетушілік; 13) Өзін-өзі жоғары бағалаушылық. Эгоизм; 14) Бір орында отыра алмаушылық; 15) Жан-жануарлар мен өсімдіктерге ерекше жақындық; 16) Белгілі бір істерді істеуден түбегейлі бас тартушылық; 17) Оларға қалыптасқан дәстүрлі тәрбиенің әсер етпеуі. Міне, «индиголардың» қасиеттері осылай тізбектеледі. Бұл аталған қасиеттер негізінен шығармашылық адамдарында бұрыннан бар. Кез келген өнер адамының өмір тарихына көз салсаңыз, оның мінездемесінде дәл осылар жазылып тұрады. Бұл не сонда? Енді жақын болашақта жер бетінде тек қана шығармашылық адамдарының мінез-құлқы үстемдік ете ме? Ия, қызық болғалы тұр. Елестетіп көріңіз, бір қалада түгел ақындар тұрады, ал келесі қалада композиторлар, арғысында суретшілер. Немесе бәрі бірге тұрады. Мәссаған, безгелдек! «Қуырдақтың көкесін түйе сойғанда көресіңнің» кері келді. Және мұны жай ғана жорамалдар мен болжамдар емес, кәдімгі ғылыми түрде зерттеу белең алып келеді. Бұл - жоғары дарындылықтың бір көрінісі емес, кәдімгі болашақ адамдарының сипаттамасы. Жаңа таным. Жаңа дәуір.
Қазақта жас баланың түріне, іс-әрекетіне, мінез-құлқына, әдеттеріне қарап оның кім болатынына болжам жасау бар. Және сол көп ретте дәлме-дәл келіп отырады. «Әке балаға сыншы». Мысалы, маңдайы ашық болса - жайдары, құлағы үлкен болса - сазгер, саусағы салалы болса - күйші, аяқ қолын төрт жаққа созып жатса - билеуші, бүк түссе - жасық, жұдырығын түйсе - ашушаң, анасының төсін тарс ұстап емсе - сараң, жай емсе - жомарт, жастықтың үстіне ұйықтаса - бастық болады деген секілді болжамдар көп. Ал «индиголарды» жоғарыдағы 17 қасиеттің байқалуына қарап ажыратуға болады. Сол қалыптасушы мінез-құлықты жөндеймін деу - трагедияға ұрындыруы мүмкін. Ал оның сол қасиеттерін басқа шығармашылық арнаға бұрып, көңілін басқаға аудару - сіздің қолыңызда.
...Балаңызға қараңызшы, ол «Индиго» емес пе?

Материал Айқын газетінен алынды

Бұл күні психологияда

psy — Tue, 09 Nov 2010 06:32:25 GMT

9 қараша Бұл күні психологияда

1898 жылы Леонард Кармайкл туылды, ол бала психологиясымен және биопсихологиямен айналысты, мінез құлықтағы тұқым қуалаушылық факторларына ерекше көңіл бөлді. Кармайкл жазған "Бала психологиясы бойынша жетекшілік” ("Manual of Child Psychology”, 1946) атты еңбегі адамның даму процесіне ғылыми сипат беруге әсер етті.

Елбасының қос томдық таңдамалысы

psy — Fri, 01 Oct 2010 10:20:38 GMT

Кеше Мәскеудегі Қазақстан елшілігінің үйінде Қазақстан Республикасының Президенті Нұрсұлтан Назарбаевтың екі томдық таңдамалы шығармаларының тұсаукесер рәсімі болып өтті. «Айқынға» бұл жөніндегі сүйінші хабарды елшілік қызметкерлері қуана жеткізді. Салтанатқа Ресейдегі Қазақстанның Төтенше және өкілетті елшісі Зауытбек Тұрысбеков, ЕвраАзЭС-тің бас хатшысы Тайыр Мансұров, сондай-ақ қазақстандық және ресейлік ғалымдар, сарапшылар мен қазақ диаспорасының өкілдері, шетел елшіліктерінің өкілдері қатысты. Қос томдыққа Елбасының Қазақстанның 2030 жылға дейінгі ұзақ мерзімдік даму бағдарламасын жүзеге асыру бағытында айтқан салиқалы сөздері, инновациялық-технологиялық даму стратегиясын талдап-жасау барысындағы елеулі еңбектері, мемлекеттік құрылыс, әлеуметтік-экономикалық модернизациялау, ұлттық қауіпсіздік пен Қазақстанның даму болашағы туралы айтқан терең ой-пікірлері енгізілген.
Салтанатты жиында сөз алған Қазақстанның Ресейдегі Төтенше және өкілетті елшісі Зауытбек Тұрысбеков мырза дәл қазіргі уақытта Қазақстанның Президенті Нұрсұлтан Назарбаевтың ғаламдық даму процестерін жан-жақты көре білудегі айрықша қасиеті мен терең білімдарлығына дүниежүзі асқан қызығушылық танытып отырғандығын атап көрсете келіп: «Алдымен экономика, одан соң саясат» деген қағиданы бойтұмардай ұстанып келе жатқан Қазақстан көшбасшысының аса маңызды һәм сындарлы ой-пікірлері осы кітаптың өзегіне айналып отыр. Тәуелсіз қазақ елінің бүгінгі қарышты дамуы - қазақстандық даму үлгісінің жарқын көрінісі» деп өз пікірін ортаға салды. Ал ресейлік көрнекті ғалым Анатолий Спицын: «Нұрсұлтан Назарбаев - осы заманғы саясатшылардың арасындағы айрықша жарқын тұлға. Оның есімі бүгінгі күні қазақ елін былай қойғанда, әлем елдеріне жақсы таныс. Бұл қазақ көшбасшысының көрегендік қабілеті мен ғаламат парасаттылығының нәтижесі. Мына қос кітапта ол тәуелсіз Қазақстанның қысқа мерзімде экономикалық-әлеуметтік дамудың күрделі де қиын жолын қалай таба білгенін және даму жолындағы реформаның нәтижелерін терең бейнелеген» деп атап көрсетті. Ал профессор Валерий Кушлин болса, бұл кітапта 1997 жылдың өзінде туған елінің даму болашағын үш ғасыр бұрын пайымдаған Қазақстан Президенті Нұрсұлтан Назарбаевтың парасатты ой-пікірлері кеңінен баяндалған. Сондықтан да әрбір саясаттанушы-ғалым үшін бұл кітаптың пайдасы орасан зор, - деп Елбасының қос томдығын айрықша бағалады.

Жомарт МОЛДАХМЕТҰЛЫ

01.10.10. Айқын газеті

ораза ұстауға қатысты кеңестер

psy — Wed, 11 Aug 2010 10:43:02 GMT

Биылғы жылы қасиетті Рамазан айы елімізде күннің ысыған мезгіліне келді. Сөзсіз бұл істе де Аллаһтың һайыры бар. Әйткенмен, ораза ұстауға қатысты төмендегі кеңестерге де ден қойған артықтық етпес. Аталған мәліметтерді өзге тілдерден аударып, бөліскен Тимур бауырымызға Аллаһ разы болсын! 1. Ауыз жабатын кезде күні бойы ағзаны қоректендіріп тұратын тағаммен тамақтану керек. Рамазанның басты тағамы – құрма. 2. Ауыз ашатын кезде денеде ұзақ тұрмайтын қуырылған тағамнан көрі ағзаны көбірек қуаттандыратын, құрамында көмірсутек көп жеміс-жидек, дәнді-дақыл, құрмамен қоректену керек. Сондай-ақ арпа не фасоль секілді дақылдардан жасалынған сорпа ішкен де пайдалырақ. 3. Күндіз шама келгенше көлеңкені паналаған дұрыс. Қолыңыздан келсе, сыртта істелетін жұмыстарды бөлме / кабинет / офис ішінде жасалатын жұмысқа ауыстырған абзалырақ. Ораза кезінде ағза сусызданатын болғандықтан, шөлден қаталамауды ойластыру қажет. 4. Ауыз ашқан соң мүмкіндігінше сұйық көбірек ішу қажет. Суды молырақ пайдаланса да дұрыс. Күні бойы су мөлшері азайған ағзаның қажет көлемде қайтадан ылғал мөлшерін қалпына келтіру қажет. Сол кезде ертесіне де ауыз бекіту оңай болады. 5. Дене жұмысымен айналысуды азайту абзалырақ болады. 6. Бұл өмір адам мен шайтанның арпалысы болғандықтан, кімнің әрекеті күшті болса, сол жеңеді. Сондықтан Аллаһ Тағала осы айды Мұхаммедтің үмметіне (с.ғ.у) рақым етіп сыйлады. Ендеше Аллаһ Тағалаға деген құлшылық-ғибадатымызды арттыра түсуіміз қажет. Намазымызға мән беру керек. Намазды дұрыстау керек. 7. «Ұмытылған» Құранды қолға алу керек. Күніне құрығанда бір аят та болса оқу керек. 8. Пайғамбарлардан басқа адамдардың барлығы күнә жасайды. Ендеше, өзің білетін күналарды жасауды қой, қоюға тырыс. Тәубе ет. Шындығында Аллаһ тағала – Тәууәб (тәубелерді қабыл етуші). 9. Мұсылман бауырларыңмен байланыс жаса. Біреуден екі, екеуден үшеу жақсы. Ислам – жамағат діні. Жалғыздың досы – шайтан болады. 10. Дұға жасауды ұмытпау қажет. Қол жайып, тілек сұрағанға Аллаһ Тағала жауап беретінін ұмытпау. Пайғамбарымыздың с.ғ.с. жасаған дұғаларын пайдалану. 11. Садақа беруді ұмытпа. Шындығында садақа тозақтан алыстатады. 12. Ата-анаға меіріммен қарап, ағайын-тумамен байланысты күшейту қажет. 13. Өзің білгенді өзгеге де айтып, үйретіп, Алланың тура жолына шақыру…